It matters not how strait the gate

How charged with punishments the scroll.


I am the master of my fate


I am the captain of my soul

الأحد، 28 نوفمبر 2010

فى محطة الأوتوبيس

فى أثناء وقوفى فى محطة الأوتوبيس إنتظاراً وقفت فتاتان منقبتان  .... وترامى إلى مسامعى بعض كلامهم واحدة منهم كانت واخدة قيادة الكلام و الثانية لا تزيد عن التعليق
الاولى : أنا لبست الطرحة و أنا عندى 20 سنة و برضه محدش أتقدم لى . لبست الخمار برضه محصلشى حاجة ، و أدينى أتنقبت فاضل أيه تانى علشان يعرفوا انى متدينة و اخلاقى كويسة

الثانية : أصبرى يا سمر و هى تفرج ربنا مش هيضيع أجرك

الأولى : مش أنتى اللى قولتيلى أن أى شاب دلوقتى عايز المتدينة  و أقنعتينى بأنى ألبس البتاع دة .
الثانية : يابنتى أصبرى  طب ما أنا أتخطبت أهو و شوية و هيجى دورك و كله بوقته  .


لم يطل الوقت بعد هذا جاء الأوتوبيس  ، و ركبت و كان فى دماغى خاطر واحد بعد الجواز سيكون حالها مثل هذه

هناك 18 تعليقًا:

MSMO يقول...

تصدقي مش عارفة اعلق اقول ايه اعلق علي الفيديو ولا علي الموقف بتاع البنتين علي المحطة بس مادام هي رضيت توطي وتنحني ومش عارفة قيمة نفسها يبقي تستحمل كل اللي بيجرالها بس الواحد يرجع يقول وهي هتعرف قيمة نفسها منين إذا كنت هي تم تربيتها وإعداها علشان تكون في الآخر خادمة وجارية عند الرجل
أنا بصراحة علي قد ما هي صعبانة علي علي قد ما هي تستاهل اللي بيحصلها
:((

Tears يقول...

و مين اللى قال للاخت اللى لبست نفسها كمامة ان الرجالة بالغباء ده؟

مافيش راجل بيدخل عليه موضوع الطرح و لا النقاب و ياخده على انه ختم ضمان جودة اخلاق

و بعدين فى رايى ان لو واحدة بنقاب ح تقدر تعمل اللى هى عايزاه و تروح المكان اللى يعجبها فى اى وقت و مع اى حد و ماحدش يقدر يجزم انه شافها و بالتالى النقاب ده تسهيل للمشى اللى مش كويس مش العكس

طيب اقولك انا ايام الدراسة فى ثانوى كنت فى مدرسة اجنبية من اللى بيدفعلهم بالاربعين الف فى السنه و كان الجو عندنا صحى و الدراسة بجد بس بنت دايما كانت بتقول انهم متدينيين لقيتها بتفضفضلى انها لما بتحب تروح لصاحبها بتتنقب و بكده بتقدر تعمل اللى هى عايزاه من غير ماحد يعرفها و لما بتخلص بتقشر كل ده و ترجع عادية

عارفه المدرسة كلها ماكانش فيها غير تلت بنات محجبات قرايب بعض بس و انا صغيرة كنت فاكرة ان دول اكيد كويسين لغاية ما فى مرة داخلة الحمام لقيت بنت منهم جوه فاكة الطرحة و منزلة شعرها و واخدة ولد من اللى معانا فى الفصل جوه و من رعبى من المنظر طلعت اجرى و بقيت من ساعتها عارفه ان الشكل لا يعكس الحقيقة دائما و ان خير الامور اوسطها... على فكرة البنت دى قبلها باسبوع رفضت تتصور معانا صورة الفصل الجماعية بدعوى ان التصوير حرام

اسفه على التطويل

شريف القاضى يقول...

الاهم من النقاب والخمار والطرحة ...هو الاقتناع بفكرة أرتداء أيهم ...
للاسف الموضوع عندنا تدين مظهرى لا أكثر ...ويكون لاغراض ونوايا أخرى ....

Desert cat يقول...

هو ايه اللى جنب الراجل اللى قرفان ده ؟
كيس زبالة مش طايق يبص فى وشها ور يحتها علشان كدا حطط وشه فى الشباك وبيتكلم بقرف

Ms Venus يقول...

يا خبر


حرام بجد


ليه دايما شايفين الست ناقصة ومصدر غواية ولازم تتكلفت وتلبس شوال وميبانش منها اى حاجة وحتى صوتها لا

حرام

ليه ؟

جوزيف بطرس يقول...

يا لهوى!! شوفتم القلم؟؟ بس على فكرة... البنات هما اللى بيعملوا اعتبار لنفسهم و يخلوا الناس يحترموهم. على رأى حسن الهلالى صاحب مدونة (حجاب نقاب و قاذورات أخرى)

"البنات هما اللى هيقدروا يجيبوا حقهم لنفسهم، مش يستنوا حد يجيبهولهم"

ELVIRA يقول...

MSMO

هى تستاهل اللى عملته فى نفسها ، لكن من ناحية تانية فى غالبية العائلات بتربى البنت علشان هدف واحد هو الجواز مهما كان النستوى الإجتماعى لأى عائلة منهم لازم البنت تتجوز

ELVIRA يقول...

Tears

لا أبداً تطويل أيه اللى بيحصل دة حقيقى و مغرق الدنيا لكن فى بنات كتير عندهم أزمة ثقة أو أزمة أحترام للنفس ورغبة أن الناس تقبلهم ، بس انا صعبان عليا الحبسة اللى هى فيها حتى لو دخلتها عن اقتناع او استهبال ليه ما يكونش باب الخروج مسموح به كمان

ELVIRA يقول...

شريف القاضى

كان فيه كلمة لأحمد خالد توفيق لما قال أن المهم هو أن تبدو و ليس أن تكون .. هو دة اللى أحنا شايفينه كل دول بيكدبوا على بعض

ELVIRA يقول...

Desert Cat

اللى جنبه كيس زبالة تحتح واحدة أتزلت و أتهانت قدام الدنيا كلها

ELVIRA يقول...

Ms Venus

دى عقدة نقص يا فينوس بدل ما الأهل يربوا أولادهم وبناتهم يعزلوهم عن بعض و يكفنوا البنات و يبقوا كدة عملوا اللى عليهم فى حفظ الفضيلة و الأخلاق الحميدة و النتيجة زى ما انتى شايفة

ELVIRA يقول...

جوزيف

البنت هى اللى تجيب حقها لنفسها .. صح ، بس علشان دة يحصل فى مجتمع زى مجتمعنا لازم يكون عندها قوة شخصية رهيبة و ثقة فى النفس علشان تواجه الضغوط بتاعة العالم اللى هى عايشة فيه

Migo Mishmish يقول...

على فكرة انا مش فاهمه الفديو تماماً. يعني ده مقلب ولا ديه كاميرا خفيه في التاكسي بتبين تصرفات الناس الغريبه
عموماًدبه حاجة متضايقش المنقبه لانها شايفه نفسها متاع ولازم تتغطى. لانها ملكيه خاصه. هي بتعترف ان وجودها فيه مشكله ولازم تبقى كيان تابع لاي ذكر
Love,
MishMish

Elmasryeffendi يقول...

و هو مين الحمار ده اللى هايخطبها من غير ما يشوفها ، الناس بتتقدم فى كل العالم الا احنا بنتاخر و نزداد تاخراً

ELVIRA يقول...

Mishmish

لا يا مشمش دة برنامج تاكسى مصر على otv
كانوا بيحطه كاميرا فى التاكسى من غير ما الناس تعرق و المذيع هو السواق ويجرجر الناس فى الكلام و يشوف أرائهم أيه
بس اللى غايظنى أن حتى المعملة من النوع دة بقت كمان علنى

ELVIRA يقول...

elmasryeffendi

لا من الناحية دى الحمير كتير و أديك شايف البلد بقت عاملة ازاى دى قربت تبقى أفغانستان على صغير كدة

Kontiki يقول...

من الصنف دة كتير الصنف الاوقح بقى اللى يتعرف على بنت سافرة و يعيشها قصة غرامية و يعشمها و بعدين يقولها اتحجبى بقى عشان اخطبك يا اما خلاص

ELVIRA يقول...

Kontiki
عندك حق بس الموضوع فى النهاية يرجع للبنت و مدى إحترامها لنفسها و تقديرها لإنسانيتها لو بتقدر تعتمد على نفسها يبقى مفيش حد يقهرها أو يزلها بموضوع الجواز